في ليلة الجمعة

[الدويسي الفضلي]

في ليلة الجمعة مع ليلة السبت=في آخر ليال أيام عيد الضحيه


جمعت بين النفس والدمع والصمت=كنوز همن في فؤادي خفيه


يامحرقن دمي لياجيت وإن غبت=يامولعن قلبي بصبح وعشيه


يامغوين فكري على هاجسن زفت=يامطفشن نفس تحب الوفيه


وش آخر النية تراني تعذبت=وش جابنا نمشي بدربن سويه


أباسئلك من ربك اليوم ماخفت=ولاطرت في خاطرك مشفقيه


ياحزن لو إنك عليه تفضلت=ماشفت عيني من سواتك شقيه


دخلت في قلبي صغير وترعرعت=لين أصبحت دنياك تأمر عليه


ياحزن ربيتك وأنا الحين وقفت=أبي تفارقني ونمحي الخطيه


أخطيت في حقي وأنا أقول سامحت=لكن عيني لاتشوفك قفيه


ياحزن يمكن من صفاتك تعلمت=بعض الدروس الغامظات العصيه


والله لاجيت المجالس وسولفت=أحس نفسي تحبس أرواح حيه


صاير صديقن للعناوين مارحت=تبغى تسوي حضرتك فوضويه


ياحزن مايخفاك ماأخفيت بالكفت=وداري بنفسي ماتحب الرديه


كم ليلتن مع صاحبي قدتنقدت=أستأذنه ماأمداني أجلس شويه


لاجيت أكلم صاحبي قلتلي شفت=إنك على دربي تسوق المطيه


دربك تراني ماسلكته ولاجبت=طاريك له في سالفه أو قضيه


ياحزن من عيبك تراني تعقدت=كني غريمن لك وفيني وصيه


أغرقتني في بحر الأوهام وهرجت=بعض النجوم الساهرات الحليه


وكم ليلتن في بردهاصحت وأسهرت=عينن من الهوجاس جاها بليه


وكم ساعتن تبكي على حالهانمت=وأصحى وألاقي خدتي مسرحيه


وأطلب تمن حاضر تراني تكفلت=لأعطيك ماتقدر عليها يديه


وشف لك خوين غير قلبي ولاهنت=على طريقك لاتوصي المنيه


الشاعر : ياسر بن محمد الدويسي

[ابن عبيدالله]

صح الله لسانك

ابيات قمة الروعة

مزيد اخي الحبيب من الابداع الشعري

[راعي العليا]

صح السانك ياياسر وتسلم يمينك

احسنت باختيار القافيه

[شاعره الفضول]

صـح لـسـانـك اخـوي يـاسـر الـدويـسـي

تقبل مروري ---->> شاعره الفضول

[عبدالله الدويسي]

صح لسانك يـ بو تركي .

أبيات ممتازة و لا تبخل علينا بـ جديدك.

[إيمان الجراي]

آبيات رآئعه ،،،، صح الله لسانك

تسلم أناملك على ما كتبت

تحياااتي لك

تقبل مروري

[ابو ريان]

تحية طيبة أبو تركي , أبيات جميلة و رائعة تدل على عمق المشاعر والأحاسيس نتمنى أن نرى المزيد من العطاء المتجدد .

[سلامه العايد]

صح لسان وسلمت يمناك على هذا الطرح الطيب لاهنت

ابدعت في طرحك فشكراً لك بم نقلت لنا

دمت بحفظ الرحمن

[خالد نوارالفضلى]

صح الله لسانك اخى

ابيات قمة الروعة والجمال

تحياااتي لك

[سنجار وقفار]

صح لسانك ابوتركي قصيده روعه

[محمد الذرفي]

صح السانك اخوي بيات رايعة بس عندي ملاحظة بسيطه وهي صدر البيت بنيته على حرفين مثل السبت , تغيبت , تعذبت ثم بعد ذلك غيرته مثل الصمت الى اخر القصيدة هذا يخل بالقافيه ارجو ان تقبل مروري وملاحظاتي دمت بخير

[سنجار وقفار]

اخي العزيز محمد هناك ملحوظه على ملحوظتك انك نسيت ان الشده والسكون تعتبر حرف والسبت وغبت الزام مالايلزم وبامكانك عرضها على اي شاعر فستجد ان القافيه سليمه ولك مني جزيل الشكر :)

[محمد الذرفي]

اخي العزيز محمد هناك ملحوظه على ملحوظتك انك نسيت ان الشده والسكون تعتبر حرف والسبت وغبت الزام مالايلزم وبامكانك عرضها على اي شاعر فستجد ان القافيه سليمه ولك مني جزيل الشكر :)

اخوي الشعر مايعترف بالشده والسكون عطيك مثال تقريبيالسبت.غبت, طبت, شبت, هبت, جبت, ماخبت,تكهربت, تدربت,تغربت,الثانيالصمت, قمت, عمت ,همت , نمت, شمت ,افهمتالاول حرف ب +تالثاني حرف م +تالثالث زفت, عفت ,شفت , خفت ,عرفت, طفت, حرف ف+ت

[الصقررر]

صح لسانك

تسلم على القصيده الجميله

دمت بود

[سنجار وقفار]

اخي العزيز محمد يبدو انك مافهمة وش اقصد او انا ماعرفة كيف اوصلك المعلومه لكن انا بكتب لك قصيده لشاعر الكبير مهدي بن سعيد واتوقع انه شاعر معروف لايختلف عليه اثنين وبامكانك البحث عنه في قوقل قصيدته تقول

يامتعب الخطوه على الدرب لاهنت وشلون تحزن والشمال بجهاتك

جرب تمارس ضحكتك وين ماكنت واحزان عمرك سترها في عباتك

الريح قامت وانحنت وانت ماقمت ياحي لاتنهار قاوم وفاتك

ياكبرها لاصاح داعيك وين انت وجا ينتخيك ولا لقا الاعصاتك

ادري وصلت اخر الصبر وتعبت مابه نكد في رحلة الهم فاتك

بعض المرايا تعكسك مثل ماانت ولابعضها مايوريك ذاتك

اخترتلك بعض الابيات من قصيدته الي تعتبر من افضل القصائد الي كتبها ولاحض القافيه واتمنى انك فهمت قصدي .....اخوك ابو تركي

[ولد حائل]

أخي الدويسي الفضلي صح الله لسانك قصيدة رائعة وإلى الامام

[صالح الدعفس]

صح لسانكـــ واعلي شانكـــ يالقرم ..

[حاتميه]

أبيات جميله تنم عن شاعريه مرهفه

صح لسانكـ شاعرنا ياسر

ولكـ الشكر الجزيل لإتحافنا هذ النص الجميل ونطمح للمزيد

مع وااافر التقدير

,,’,,

[علي بن وسمي]

ابيات طيبه من قلب طيب مشكوووووووووووور

[سر القوافي]

صح السانك ياياسر وتسلم يمينك

احسنت باختيار القافيه