محاوره شعر بين بنت البدو ولد حضر..

[مهندسه]

السلام عليكم ..


قالت الله لا يهينك انت خابرني بدوية

ما احب الي يمسس غترته ويضبط عقاله

أنا ودي ببدوي يمشي بدمه حمية

لا تعزوا بالقبيله كلهم صاروا عياله

البدو غالين عندي لو حصل منهم خطية

الولد فيهم يساوي شيخ بجاهه وماله

قلت انا أنعم وأكرم ما كذبتي يا اجودية

سجل التاريخ عنهم البطولة والجماله

لكن الله لا يهينك لا تناسين البقية

الحضر رجالهم يا وسع صدرة وطول باله

في المواقف إنشديني ما يتخلى عن خوية

لا فزع ما عاد يدري من وراه ومن قباله

وضيفهم يبشر بعزه والوفاء والمقدرية

كل واحد يسبق الثاني ولا ندري بحاله

قالت اكبر عيب فيني يا الحضر النرجسية

ما أظن أحدٍ بيغريني بطبعه أو جماله

أنا احب الي زهابه حاجتين وبندقية

يفتخر بالذود ويسرح كل يوم في حلاله

وانلفاه الضيف شاف الفرق شاف الناس حية

بدوي صوت نجره أطرب الطرقي وجاله

قلت أنا ليه اختلقتي فرق وسويتي قضية

الكبر لله والمؤمن ضعيف براس ماله

يا بدويه الجروح اللي من أسبابك ندية

والخفوق اللي تحرا جيتك ياما جراله

والعيون اللي تمنت شوفتك صارت شقية

والفراق اللي بليا ذنب يذبحني لحاله

قالت الله لا يعاقبني أنا بنتٍ بريّة

من السوالف كلها والحب وين اللي وفاله

يا ولد لا تحسبني جاهله ولا غبية

الهوى ما هو كذا والحب انا ما بي مجاله

أنا أخوي ان قال أخو فلانه عرفت إني بدوية

تجتمع روس العرب له من يمينه من شماله




منقول

[سر القوافي]

صح لسانك ابداااااااع.


اعجبنى المقطع الى تقول فيه..

يا بدويه الجروح اللي من أسبابك ندية

والخفوق اللي تحرا جيتك ياما جراله

والعيون اللي تمنت شوفتك صارت شقية

والفراق اللي بليا ذنب يذبحني لحاله

قالت الله لا يعاقبني أنا بنتٍ بريّة

[مهندسه]

صــح بدنك اخوي .

واسعدني ان القصيده ارتقت لذائقتك .

[عواد الفضلي]

لافرق بين بدوي وحضري لان الاثنان مكملين لبعض لااحد يستطيع الاستقناء عن الاخر
وكلهم خير وبركة
ولاتووووووجد مواصفات متشابهة باشخاص معينين لاكن هناك تقاليد واعراف تسود الناس
ولاكن الاخوة بينهم اختلافات ذاك كريم وذاك بخيل ذاك شجاع وذاك جبان وغير ذلك فلا يعمم الشي سواء كان ايجابي ام سلبي
وقد تكلم ابن خلدون في مقدمتة عن فضائل اهل الوبر وهم البدو واهل المدر وهم الحاضرة
ولكن انا حسب رايي المتواضع هناك تفاوت بينهم بالقوة والذكاء ةالاثنان لايفترقان مكملين لبعض

وكلي شكر لكم وارجو ان تقبلوا التعليق مني سواء كان خطا ام مقارب للصح

[مهندسه]

اخوي القصيده ماتفضل احد عن احد لتنقص بلحضر هي القصيده البنت البدويه تفضل البدوي اكثر من الحضري وكيفها هي ورايها نقولها ليش تفضلين البدوي كل واحد ورايه واتمنى تقرا القصيده مره ثانيه اخوي والسموحه اتمنى ماتزعل من كلامي

[مهندسه]

وشكرا على المرور اخوي .

[الإمبراطور]

قصيدة اكثر من رائعه
وسلمت يداك على النقل
دمت بود