شيخة العوب ثامر شبيب

[التميميه]

هذه القصيده للشاعر المتميز / ثامر شبيب الدقباسي الرشيدي


كل البشر في صوب وهالبنت في صوب
الكامل الله كامله ماتعابي


ترفه وهي تمشي مسافات ودروب
في عز رحلات الشقا والعذابي


لامن مشت في يدها ترفع الثوب
كلن يناديها وهي تقول مابي


من الدلع سميتها شيخة العوب
حتى دلعها منحني له عجابي


مركوبها ماهو بأيات مركوب
من مر قدامي تلنه ركابي


لحقتها والهرج زاهب ومكتوب
لأي موقف كنت عامل حسابي


قلت السلام وردت بأيش مطلوب
قلت الخفوق بخفت الدم ذابي


قالت وش اللي حدك لناري تذوب
قلت المشاعر ماعليها عتابي


قالت تمثل دور عاشق و محبوب
قلت الحقيقه افتديتك بشبابي


قالت اخير الحب ناهب ومنهوب
قلت انهبيني قبل لانقل صوابي


قالت متى تكبر عن الحب وتوب
قلت الخبل من شاف زينك وتابي


قالت صراحه ما توقعتك اسلوب
قلت افهم انك معجبه في جوابي


فجأه عرضلي واحد عرضت خروب
سلم علي وخاطر البنت طابي


جاني مطفي ضارب فياض وشطوب
ومن قو عينه قال يامرحبا بي


واخذ يسولف لي وانا فيه مغصوب
يسئل عن احوالي وسبة غيابي


مايدري انه في عرضته كسر قلوب
لا واعذابي منه لا واعذابي


رقد على كبدي وانا بوقت محسوب
البنت راحت والرجى منه خابي


وقفت عاجز كني انسان مغلوب
من قرد حضي كل هذا جرابي


اتلا عهدها تلتفت لفت رعبوب
مالله كتبها قسمة في كتابي


اقفت تمشى في مسافات ودروب
قلبي يناديها واهي تقول مابي

[سلامه العايد]

بارك الله فيك الهاجي على هذا الاختيار

وصح لسان ولسان الشاعر ثامر شبيب وسلمت يمناك على النقل والذائقه الرائعه

من الدلع سميتها شيخة العوب
حتى دلعها منحني له عجابي

وكل شخص يلقب محبوبه في اجمل الالقاب على العموم اشكرك جزيل الشكر

على هذا الذوق الرفيع وفقك الله بمّ يحبه ويرضاه

دمتي بحفظ الله.

[الفارس الفضلي]

ابداع راقي بكل ماتعنية الكلمة الصراحة القصيدة اطربتني
وصح لسان شاعرها وسلمت يالهادية على الانتقاء الجميل
ويعطيك العافية

[النشميه]

صح لسانك واعتلى شانك
تسلم يمينك على النقل
لاعدمنا طرك المميز
تحياتي

[أخصائي مختبر]

صح لسان الشاعر ولسان من تكلف بنقلها

قصيده روووعه

احترامي