حنا العرب يا مدعين العروبة

[عذب المشاعر]

للشاعر خالد الفيصل أسلوب مميز .... و لشعره جمهور كبير

خلال أيام الغزو العراقي الغاشم للكويت ... كانت الحرب على كل المستويات مستعره

و لم يكن المستوى الإعلامي ببعيد عن تلك الحرب

بل كانت أكثر المستويات سخونة ً في تلك الأيام

و أستخدمت جميع الوسائل المشروعة و غير المشروعة لهزيمة العدو (آنذاك) إعلاميا ً

و كانت القصيدة الشعبية أحد هذه الوسائل المهمة و الأغنية الوطنية كذلك

هذه القصيدة و التي سنلحقها بعد قليل كانت مهمة في توقيتها و حازت على صدى واسع

و ردة فعل أوسع ... و كان الجمهور قد توزع ما بين مرحب و مستنكر

و تردد صداها على مستوى الوطن العربي رغم ضعف القنوات الإعلامية التي لم تعرف الفضائيات بعد في ذلك الوقت

أترككم مع هذه القصيدة ذات المستوى الشعري الرائع ... و لكم الحكم بعد ذلك عليها ...



حنا العرب يــــا مدعين العروبة


وحنا هل التوحيد وانتم له أجنـــاب


وحنـــا شروق المجد وانتم غروبه


وحنا هل التاريخ وأنتم به أغــراب


يوم الفقر شلتوا علينا عيوبـــــه


واليوم عقب النفط جيتوا لنا أنسـاب


ويوم الفقر فينــــا البداوة سبوبة


واليوم صرتوا مثلنــا بدو واعراب


لو الهوى منكم منعتم هبوبـــــه


لا شك رزاق الملا رب الأربــاب


ولو المطر منكم منعتم صبوبـــه



لا شك رزق الخلق من عند وهـاب


جيش الحسد سقتوا علينا حروبــه


كل يبي يزرع على جسمنــا ناب


حرب على المحسن تراهـا عقوبة


بالله عســـاكم ما تفيدون حراب


يا ما عطينــــا ما ندور مثوبه


إلا من اللي من ترجــاه ما خاب


ويا ما نصرنـا صاحب ضيقوا به


عاداتنا نقدم الى مالردى هـــاب


ويامـــا نصانا من تعثر دروبه


يدخل حمانا من تعذرة الأصحـاب


حنـــــا بنينا دارنا من طيوبه


وانتم سلبتوا داركم كل ما طــاب


الله سقانا من بحرنــــا عذوبه


وانهاركم مثل البحر هدر تنسـاب


حنا زرعنا الحب بارض خصوبه


وانتم زرعتوا كره الأجيال بتراب


وحنــا دعينا السلم نوبه ونوبـه


وانتم حمــام السلم بعتوه بغراب



يا من دعا للحرب ما درك خطوبه


لا تحسب أن الحرب تهديد وخطاب


من شب نار الحرب يصلى شبوبه


ومن ثور الفتنة تعرض للأسبـاب



ما يستر الرجــال ملبوس ثوبه


الدين وافعال الكرامــة له ثياب


ما يقبل الرجال بحمـــاه حوبه


مـــا دام له حق وللحق طلاب

أخوكم : عــــــــــــــذب المشــــــــــــاعر

[بنت الطائي]

صح لسانك فالك التوفيق

[عذب المشاعر]

أختي الغالية شيخة الفضول
أسعدني حضورك ومرورك الكريم

[مرهف الأحساس]

تسلم على القصيدة

[حمد سعد]

مشكور اخي عذب المشاعر على الشعر الطيب
وجزاك الله خير
دمتم بالف خير

[عذب المشاعر]

العفو أخوي
نسيم الربيع
الشكر لشخصك الكريم على مرورك

[حمد سعد]

حنا العرب يا مدعين العروبة


وحنا هل التوحيد وانتم له أجناب

مشكور لك اكثير
اوتمنى لك دوام النجاح

[بن يحيى]

مشكوووووووور أخوي عذب المشاعر على القصيدة


ماشاء الله عليك قصايدك قمة في الذوق


وصح اللسانك


تقبل تحيات أخوك :

بن يحيى[/move]

[راعي الاوله]

نقل متميز
الله يعطيك العافيه

[قلب الذهب]

راحت الحرب وراحت الخلافات واخينا توه تذكر ينشر القصيدة

ماكان ودي ينفتح ها الموضوع فيه حساسية شوي

ولكن دام انفتح بعطيكم رد الشـــاعر اليمني هــادي بن غريب العبيدي على قصيدة خالد الفيصل

حينما قيل أن قصيدة الفيصل يقصد بها اليمن

أيضــاً بعطيكم رد لشاعر عراقي على قصيدة الفيصل

نبـــدأ برد الشاعر اليمني هــادي بن غريب العبيــدي


[size=4]عاشـت يمـن لَـحـرار دومــاً طَـروبـه *** نَبْـع العروبًـة يــا عليلـيـن الانـسـاب
جَـذر العـرب واللـي هجـاهـا نَسـوبـه *** هـي السـاس والمدمـاك ياظلَّـة البـاب
كـل العـرب منهـا نسبـهـم بــدوا بــه *** خلَّـف بهـم والفـرع ذي منّـه أنسـاب
مــنـــارة الـتــاريــخ وأول جـلــوبــه *** تاريـخ أصالتهـا علـى الكـل غـصَّـأب
سـنَّــة بـلــد لَـيْـمَـان الأُم الــرؤومــه *** بـلــدة كـريـمـة صـانـهـا رب تـــوَّاب
منهـا نصَـر لِسـلام يـوم أشركـوا بـه *** وحِنَّـا حمـاة الديـن يـاولاد الاحــزاب
والفاتـحـيـن أحـنــا لـلاســلام بـوبــه *** والضاربيـن بكـل صِمصـام قـرضـاب
حتـى تركنـا الـكـون تـاضـي دروبــه *** بـالـلـي رسلله مـــن خـالـقـه جــــاب
ولا تركـنـا الكـفـر حـتـى أمـنـوا بـــه *** والعدل عَمْ أبنـاء العروبـة والاجنـاب
يامنكـر أبـطـال اليـمـن فــي خطـوبـه *** الـقِـل مــا يحـنـي طويلـيـن الانـيــاب
حِـنْ نطـرد المحتـل وأنتـوا تجـوا بـه *** تستنصروا بالمشركة ضد الاصحـاب
وأفـعـالـكـم وكُــــلْ مـاتـدَّعــوا بـــــه *** خَسِـرْت وأنـت تقـول رابـح وكسَّـاب
جبتـوا لحاميـكـم حـمـى تحتـمـوا بــه *** وأصبـح حمـا حامـيـك للـحـق نـهَّـأب
وأصبـحـت يالتـاجـر بعيـنـه جـلـوبـه *** مملوك حكمك حكم من هم لك أضراب
تبغـى اللبـن والمصـفـرات أمحلـوبـه *** ياللي مَسكت الـرَّاس وسـواك حـلاَّب
بـنـيـت مـجــدك والـربـابـه تــروبــه *** وَالْقَوا على عينـك نواظيـر وأحجـاب
مسكـيـن يـامـن قـادتـه غــرروا بـــه *** سامر على نور القمـر والقمـر غـاب
المجـد هـو لـلـي حِـمـاه أعتـنـوا بــه *** أهل اليمن فوق الحضـارات الانجـاب
وأصحـابـه الـمـلاَّك مــا ودَّعــوا بــه *** سِيـنـا حراسـاتـه طويلـيـن الاشـنـاب
مـا ينهـبـه مــن ســار حـقَّـه نهـوبـه *** حِـنْ ظِلَّـه الـواقـي وطـوقـه ولَطـنـاب
والـجــار لا ذانـــا حـمـلـنـا عـتـوبــه *** نحـفـظ جــواره مــا نجـازيـه بعـتـاب
مـا نحسـده نفـطـه وربــح الكسـوبـه *** حاشاء ولا نرضى على الجار خِـرَّاب
يـاكـم بـذلـنـا جـهـدنـا فـــي رحـوبــه *** واليـوم جازانـا علـى الجهـد بسـبـاب
من قال عيب النـاس فَضْحَـتْ عيوبـه *** والبـادي أظلـم يــا فطينـيـن الالـبـاب
حُـر الـعـرب مــا يرتـضـي بالغلـوبـه *** والدهـر هـو يوميـن يغـلـب وغــلاَّب
وأصل العرب حِـن قمتـه فـي نصوبـه *** حِنْ قِمته واللي يَبُوا الـراس الاذنـاب



وهذاا رد الشاعر العراقي رعــد الشلال الجربا .. حينما قيل أن الفيصل قصد بقصيدته العراق وليس اليمن.

الله ياشيخ تعثربثـوبـــــــــــــه .........بـلاه ذيب وهـو بـلامنناذيـــــــــاب

الله واحتطناللاشعارنـوبـــــــــه.........وحقك تحسب للحكي مية حساب

سهله من الطيب تفوت بصعوبه......وصعبات بعض رجال ماتحسب صعاب

يابن الكرم غلطه عليك محسوبه........يـومـك تغـربنـاومـاكلنااغــــــراب

يابن الكرم بعض الحروف مغلوبه......وبعض الحروف الصادقه تكسراحراب

العدل بسمان القصايدعـذوبــــه.........والعين وش قيمة حورهابلااهداب

من هاب ينهاب وللاشراف حوبه..........ولاهنت قولك يابن الاجوادماصاب

منـاولنـاوفينـاوعلينـاالعروبــــــه..........ياجزل قول صابت العين وانصاب

والفخـربالتاريــخ عــزه كذوبــــــه..........وارقابناوالقدس بكفوف الاجناب

تـاريخنـايايــخ حنـاعيـوبـــــــــه..........وامجـادنـارمـحين قضـابهن خاب

رمـح طـعن مسلم جرح فيه ثوبــه.......ورمح طعن ظهرانحناوسالت انساب

وفيـه الزمـان اللي وطتنـادروبـــــه.....تحمى الغنم من سطوت الذيب بكلاب

والريـح نحـرم بعضنـامـن هبوبـــــه........فيـه الـزمـن لوكان للريـح مقضــاب

امـاالـرتب والنفط تـربـه خصـوبـــــه.........تنبت مهـازل بأختلافات الاسبـــاب

مدري العروبه ظهـرربعي غــدروبــه.........والاالعروبــه رمـح بظهـورناغــــاب

وقصيدتــي طـاهـرلك الـلــه ثـوبـــه.......والصوت داوي ولامـع الصوت مخلاب

وســـلامتكم

أتمنى يكون هذا المنتدى ديمقراطي ومايصير خلافات

ولكم تحيــاتي ،،

[شيخ ولد شيخ]

[]

حِـنْ نطـرد المحتـل وأنتـوا تجـوا بـه *** تستنصروا بالمشركة ضد الاصحـاب
،،


اخي ابو قلب ذهب ان من اتى بالمشركين هو الطاغية المقبور صدام واعوانه ومن ايده من اشباه الرجال ولايمكن للاصحاب ان يعتدوا على جيرانهم ويقتلونهم ويشردونهم .
ولولا الله ثم المملكة السعودية لما كان هذا حالنا .
وحفظالله بلاد المسلمين من كل سوء .
واتمنى من الادارة حذف اي موضوع يسيئ لاي شخص او بلد

[عطـــــر الخزامـــــى]

صح الله لسان اللي قالها واللي نقلها

واخووووي قلب الذهب <بليز تقدير لم
شاعر لكويتين ماترد هالرد البايخ
لاتنسى عيالي ماتوا وتعذبوا والاطفالتيتموا بسبت هالطاغيه
اللي الله لايرحمه لا دنيا ولا اخره

[قلب الذهب]

الســـلام عليكم ورحمة الله وبركاته


أولا يا أخوان انا لست مع صـدام ولم اتكلم بخصوص هذا الموضوع إطلاقا
فقط حطيت ردود القصائد الي جائت على قصيدة الامير خالد
ولا تنسوا ان هذا منتدى أدبي حــر ولا تحولوا الموضوع لاتجاه غير الي وضع من أجله

كنت أتمنى أن يأتي اعتراضكم هذا على القصيدة الأولى قبل أن تأتي الردود

لا أن تتغزلوا بجمال كلماتها وحسن صياغتها حتى لو كانت موجه لأي شعب من الشعوب العربية المسلمة..
لكن عندما جاء الرد اقوى من البدء وماطابق اهوائنا قمنا نعترض


وياعربي يامسلم يالي تقول لا إله إلا الله محمد رسول الله أذكر ان الرسول محمد عليه الصلاة والسلام

قال اذكروا محاسن موتاكم .. لا أنت تعاقه ولا أنا عقابه على ربك واعتقد العالم شاف عقابه حوكم وأعدم وأهين وخذ جزاءه بالدنيا والله مايترك حق احد ورح ياخذ حق كل مظلوم منه. إن كان كذلك
ولا احنا بس ماخذين الدين بالاسم

==================

والأخ ابو مشــاعر الي يقول ماراعيت مشاعر الكويتيين .. الكويتيين والعراقيين والسعوديين واليمنيين وكل العرب على العين الراس ورحمة الله على شهدائهم واسكنهم الله فسيح جناته.

ولا تحـــاول تقارن الي صار في الكويت بالي صار ويصير الآن في العراق فالفرق كبير جداً
كم اسرة تيتمت وكم بيت هدم وكم وكم وكم.. هذول من يبكي عليهم من يراعي مشاعرهم ؟؟!!

ليت مشاعركم الطيبة هذي توجهت لأخوانكم في العراق الي يموتون بالآلاف حرب ودمار وظلم وقهــر واستعمار وطغيان

ليه ماقلتوا للي حط القصيدة من البــداية ماراعى مشاعر العراقيين الي يموتون بالآلاف ولا ماهم بشــر ،، مايحق لنا نراعي مشاعرهم ونفتح مواضيع مثل هذي ؟؟

في الأخيـــــــر أنا ماستنقص من حق أي حد ولا لي أي غرض في إزعاج أي حد

ياليت ياليت تفهموا ..

اقول لكم شي ؟؟

أقرأو الردود وتمعنوا في جمال الصياغة والمعاني والكلمات احسن لكم
ولا تفكرو في مغازي ومقاصد هذه الكلمات وبعدو عن السياسة

أووو

أحذفو الموضوع كامل وفضوها سيـــرة


لكم تحيــاتي والسمــوحة منكم

[شيخ ولد شيخ]

اشهد ان لااله الا الله واشهد ان محمد رسول الله