يا فرحةٍ بادنى وباقصى ضميـري==يعلمبَه الرحمن خـلاق الأكـوان
فرحة كفيفٍ بات واصبح بصيري==وصار يتشوّف طلعة الصبح لابان
هي فرحةٍ من قلب صادق كبيري==منطوقةٍ بالصدق من قلب ولسـان
يا مرحبـا باللـي لفانـا يسيـري==من يوم يمشي لين شافته الأعيـان
أهلاً هلا عدّ السحاب المطيـري==واعداد ما سالت من المزن وديان
واعداد ماهـلّ الهـلال المنيـري==او كثر ما بل المطر ريق ضميان
يا مرحبا في جمـع لام الغفيـري==جمعٍ يلم الشمل ما بين الاخـوان
أولاد سعدا مشهريـن الشطيـري==وللي يناحرهم فلا بد خسـران
يا ويل من ينزل عليهـم مغيـري==ينزل ويلقى من على الخيل فرسان
قبيلـةٍ مـا مثلهـا مـن نظيـري==يشهد لها التاريخ واحداث الازمان
يا قوم ابن صلال نعـم الأميـري==فضول ياهل الراي والعلم والشان
ويا قوم ابن غدفه عيال المغيـري==بالوقت الأول فعلكم خير برهـان
ويا قوم ابن مذود عيال الكثيـري==سليل زيد الخيل خيّـال ريشـان
كثران إلى ثار الشرار النذيـري==يلقى الغنيمة من تعزوى بكثـران
يا عزوتي يا نسل اوس الشهيري==اوس الصحابي يا فخرنا بالايمـان
حنا النواسل والزمـن يستديـري==كنا ودار الوقت ثم كان ما كـان
حنا مصابيح الظـلام الضريـري==حنا سلايل طي والجـد قحطـان
ياما وطينـا كـل دربٍ خطيـري==وياما ولينـا مـن ديـارٍ وبلـدان
مير الله اقوى كل شـيٍ يصيـري==دنياً تدور وكل قـومٍ لَـه ازمـان
يالله يالمعبـود بـك نستجـيـري==انك تلم الشمل يا عالـي الشـان
يا ليتني يا ناس طيـرٍ واطيـري==واجمع سلايل لام من كل الاوطان
الطيـر مـا يرتـاح الا يطيـري==ولا يطير طير بالسما بغير جنحان
اولاد جعفـر ينثـرون العبيـري==للي لفاهم وانشدوا زين الألحـان
قلبي من الفرحة غدا مستطيـري==فرحٍ لكم يالربـع شيـبٍ وشبّـان
وآخر قصيدي والكلام الاخيـري==ابعتذر يالربع عـن كـل نقصـان
وصلوا على البدر المنير البشيري==محمد المختار في كـل الاحيـان