لاباس ياقلبي مـن الضيـم لابـاس
وش حيلتـي دام الليالـي عنـيـده
وش حيلتي مادمت من جملة النـاس
والوقـت حادينـي علـى مايريـده
حالة كسير(ن)عاقته قـب الافـراس
فوقـه شجـاع القـوم والا عقيـده
يشكي وجع ساق(ن)غدت تقل مقواس
وان صاح صيحـات الخـلا ماتفيـده
في لاهب الجوزاء والاريـاق يبـاس
الحلـق يابـس والمـوارد بعـيـده
جمر العطش في ضامره مثل الامواس
والروح بشمـوس القوايـل وحيـده
ارض(ن)يحوفه بالدجى ذيب الاطعاس
اللي يقاسـي بـه وقوت(ن)شديـده
يطوي صحاصيح الفيافي والارمـاس
والجوع وسط الكبـد مثـل الوقيـده
ماله تحت نـار البواريـد مجـلاس
ورزقه على اللـي مايخلـي عبيـده
حالي مثل حاله تحت كـل هوجـاس
وماراح من هجسي غبونـي تعيـده
هجس(ن)حرمني من مقاعيد الاوناس
وفي كل يوم(ن)له جروح(ن)جديـده
منها سهر عيني وهرجات الانجـاس
مثل المناجل فـي هشيـم الحصيـده
وعين الخبيث اللي بالاحباب بـلاس
والصبـح يرسـل بالخباثـه بريـده
لا صاد له علم(ن)بدى قرع الاجراس
يركض وروحه بالسوالـف سعيـده
في صاحب(ن)دونه مقافـل وحـراس
وناس(ن)نفوسه بالحرايـب زهيـده
حطوا لها عقد الحبايـل والامـراس
ومن قارب الغالـي شباكـه تصيـده
لاوالله الا حال مـن دونـه اليـاس
ياس(ن)سكن بالقلب يشفـط وريـده
شاد القصور بغبن قلبي على سـاس
يودع جروح القلب ينـزف صديـده
ويلي على اللي كنها عيـن قرنـاس
له مخلب(ن)يمزر عـروق الطريـده
عينه تشوف بنايد الروض مـرواس
ويودع فروق الصيـد مالـه شريـده
اصفى من الجوهر على عقد الالماس
حدت شجون القلـب تنثـر قصيـده
وصبيت قيفاني على بيض الاطـراس
ماهي خرابيـط الخبـول وعصيـده
واصبح لعقـال الشواعيـر نبـراس
ولو يدخل المليـون يصبـح عميـده
تشبه طعون كليب من رمح جسـاس
اللـي رمـت روح السنافـي فقيـده
لا شاب قاف اللي شكى نار الافـلاس
واعلـن بقيفانـه نهايـة رصـيـده
دخلـت ببحـور التماثيـل غطـاس
وعسفت غلق القاف وانهيـت كيـده
وصخرتها لو هي ورى حد تكسـاس
وسط الجبـال اللـي يهيلـك جليـده
والا غديت لجـزل الامثـال غـراس
وان ماقنـع راع المعانـي نـزيـده
مانـي بغلقـات التماثيـل محتـاس
ولا رحت للقيفـان وسـط الجريـده
ميراث عود(ن)حاز بالطيب نومـاس
والقاف يشهـد والخلايـق شهيـده
طيبه بوسط اهل الجبل يرفع الـراس
وحـروف قافـه بالمراجـل سديـده
اسقى ضميري من قوافيـه بالكـاس
وزدتـه بجـزلات الـورود الفريـده
يشبه قصيد فهيـد وعبيـد ودبـاس
اللـي مزاياهـا الحمايـد عـديـده
وبعض العرب ماهي للاشعار مقياس
دام النوايـا فيـه ماهـي حمـيـده
مااطيع انا بالنقـد دايـس ودربـاس
وحولي من العالـم عقول(ن)رشيـده
وانا بلاء حالي غلاء زيـن الالبـاس
اللي برمش العيـن ترمـي ضديـده
طيفه يزور البال في وقت الادمـاس
يسري على روحـي ويلعـن كديـده
يطرق خفايا ضامري طـق هـواس
اللي تشـق القـاع رجفـة حديـده
ويرجف بروح(ن)كلها شوق واحساس
وان داج بـارواح النشامـا يبـيـده
مطروحها مايغفـي الليـل بنعـاس
يرجـي وعايدهـا ويخشـى وعيـده
مثل العنود اللي خذت عقـل عبـاس
وعمره قضى يشكي رموشه وجيـده
وهذا سبب قولـي للاحبـاب لابـاس
وقولي ترى طبـع الليالـي عنيـده