انتبهت لدمعها بالهدب والكحل سال
لين جفت عينها دمع والقاع ارتوى

وابتدت لحظه جفا وانتهت لحظه وصال
وانطفى نور السعاده واحسب انه ضوى

مااكتفيت من الهوا والغرام اربع ليال
وقفت ايام التلاقي وجا وقت النوى

كنت ابسلى وابتسم والتفت عنها شمال
ما قويت الصد عنها ولا قلبي قوى

ماهقيت ان الهوا عذب قلوب الرجال
لين ضاع العقل مني وتفكيري سوى

رحت ادور دفوة الشمس ضيعت الظلال
جيت اطفي شعله النار والقلب انكوى

ماهقيت ان السعاده خيال في خيال
تروي قلوب الحبايب وقلبي ماروى

كنت ابشتى للهوا..والهوا ثقل الجبال
وان تحملت الجبل ماتحملت الهوى

كنت ابسلى بالهوا والهوا صعب المنال
مارضى لي حظي اللي طواني وانطوى

قلت لافراحي تعالي ولا قالت تعال
والخفوق ان قلت أبقبل على صدي نوى

الله اكبر لاشرقت شمس يتلاها زوال
كيف ابفرح في صباح مع الليل استوى

لا حصل بالحب قسمه ولا جالي مجال
غير اشوف معاند الجرح وعناد الدوى

شبت النيران واقفت وجا رد السؤال
ماتشب النار ياكود يوصلها هوى



للمبدع / حامد زيد