قصيدة للشاعر سليمان الهويدي

عشقت القمر حين القمر ينبعث به نور
وأخصّ الليالي البيض تزهاه ويزهنـّه
وأحب الهوى لاهبّ من خايعٍ ممطور
وريح النفـــل حيث النفل طيب الخنـّـه
وأحب الجمالة والجمالة عمل مبرور
وأحب الغناه وعز نفسي عـن المنـّــــه
وأحب الصراحة والصراحة بها مسرور
حيث ان الصّراحة تقطع الشكّ والظنـّـه
وأحب الكريم اللي يفرّج عن المعســور
ليا من عطى حتى أهله ما دروا عنـّــــه
وأحب الرجال العارفة وأكره المغرور
من اغترّ في بعض المظاهر يغـرّ نـّـــه
سقا الله ليالٍ ماضية قبل هدم السـّـــــور
نحفر العدود ونشرب الماء من الشـّـنـّـه
نشوف البنات ليا اوردن كنهـن الحـــور
مهـــــارٍ مشـــــاويلٍ بالأعيــاد معـتنـّــه
على الماء تشوف بيوتهم كنهـن القــــور
كثـيـر القبــايل تقطــن العــــــدّ بالكـنـّــه
على البال ذكراها يا ليت الليالي اتـــدور
يا ليت الليــــــــــالي ما خـذنـّـه يجيبنـّــه
تذكـّــــرت شــيبانٍ لنا يــوم حنـّا بـــزور
يحثــّوننا بالطـّيب والفرض والسّــنـّــــه
وعاشـو حياةٍ قاســية في بحـــــر وبرور
عسى الله يعوّضهم بما فـات بالجـنـّــــــه
ودورٍ مضى من بينهـــــم وين ذاك الدّور
زمــانٍ مضـــى له ذكريــاتٍ يحلــّـنــّــــــه
يوم ان الذهب ما يلبســونه بدون خصور
جمال النـّساء ماهو من السـّوق يشـرنـّــه
فقــدنا حياة البــــدو مع شـــوفة المظهـور
ولا عــاد به بدوٍ ولا الطـّـرش له حنـّـــــه


إنشاءالله تعجبكم ودمتم بخير