رد: الفزعه الفزعه. عين منكم لا تغيب اعتاق رقبة ابن العم/ياسر العقيد الكثيري
صح لسان الشاعر
ربي ياللي ظاهر الشمس من بعد الكسوف
محيي العظام الرميمه وكلماتك كفت
.
اتضرع ورفع اليد والجهد مخلوف
والرجاوي عند بابك ياربي اوقفت
.
ام ياسر تطلبك بين غصه بين خوف
مالنا غيرك ياربي ليا الدنيا قفت
.
انتخت في كل مسلم من البقعا الصدوف
وتنتخي في كل لام ٍ ولا عينه غفت
.
كل زله بين الاقراب في هذي الظروف
تنطوي طي الصحيفه والاقلام انشفت
.
والعزاوي تنوجد لجل توحيد الصفوف
ودونها ياما تحنت سيوفٍ و نزفت
.
والحميه نار بالراس شبتها الحروف
ومن توانا بالمواقف عسى راسه هفت
.
عند الفضول الحميه مثل ضرب السيوف
ما اتوانا باللوازم ليا الدعوه لفت
.
تنطلق ياكنها مثل وبّال ن عصوف
لين تقضي لازم الامر ولاّ مَـ اكتفت
.
مشبعين الضيف من نحر قعدان وخروف
بالمكارم مضرب امثال .. نارٍ ما طفت
.
افزعوا خلوا المصامخ بمليون وألوف
مثلكم اللي يوقف بوقفاتٍ وفت
.
بالزمن تبقى المواقف وكلٍ يبيشوف
اللي اقدم واللي قصر ومن علمه خفت
.
لعنبوا روسٍ تردت من النخوه ضعوف
يوم جا وقت المزاحم اديها ارجفت
.
اشتروا بموالكم أجر طيب و مَعَروف
فرّحوا ام اليتيم اللي دمعتها صفت
|