كبير حتى في ليبيا الشايب مظلوم
مغير متكي ونا والبنــــات انعــــاني **** حتى مرفقك منا شكت الوسادة
ونا في الشقاء والهم طول زماني **** فلاحة ومسدة والحياة مرماده
وصغاري اللي ربيتهم في احضاني **** عليهم حملت المر ذقت انكاده
قديش ماحطيت فــــــي كشبـــــاني **** وزازيت بيهم ركبتي لوساده
وديتهم م القلب كـــــــــل حناني ***** أيـــــــام المعيشة عالعباد مكاده
وقديش ياما درت بين سواني **** غاب القمر والليل شين سواده
اللقط الطايح من نخل جيراني **** م الفجر لــــــــول سروة الجبادة
وياما سهرت ومامنامي جاني **** إن مرضوا عليهم دمعتي بداده
زيت البلاد وليم هن دويانـي **** وصرة تراب انديرها كمـــــاده
ولا فيه حاجة نذوقها بلساني **** الا وين ماشبعوا وفيه زيادة
وياما وياما ريت في صغراني **** ماضي مشى ما فايده في عواده
واليوم في نعمة الله عطاني **** كبروا ضناني وهم لي اسناده
مغير الشقاء مازال ماخلاني **** الا القلب متريح ونال مراده
ياالله ياعالم اللي جواني **** الدوم السعادة ماعليك مكاده
|